Dantadöt él dër important capí che vigni porsona che é alcolisada vëiga n gran nemich tla porsona che ô le daidé.
An dess se aspetè te vigni cajo che le alcolisé se pares y devëntes agressiv.
Impormó canche la porsona che à chësc problem le vëiga ite, se lasciaral daidé. Chësc sará tan inant canche i problems sarà tan gragn che gnanca plü l’alcol i fej desmentié ia. Da chësc momënt inant se lasciarà la porsona daidé.
Cina che ara é tan inant che l'alcolist realisëia chesta cossa à i familiars n compit dër rí.
Al é important
che an considerëies n per de cosses tl momënt che an capësc che chi che se stà dlungia é alcolisà:- An dess se chirí por se instësc n grup de autoaiüt, te n te grup pon baié di problems y an ciafa consëis da porsones espertes.
- Informesse sön l'alcol en general, deplü cosses che an sà te chësc ciamp y miú che al é.
- Informede le dotur de ciasa dla porsona che à le problem, cuntede ci che minëis che al pois ester y splighedi sües manîres. Chësc n’é nia tradí na porsona, mo la daidé. Insciö po n dotur se arjigné a afrontè les conseguënzes de sanité de chësta persona.
- Ne stede nia a incolpè chësta porsona ciamó deplü. Ara se fajarà bonamënter bele instëssa n gröm de pinsiers y sce ara se sënt sforzada podessera gní agressiv y bëre ciamó deplü.
- Evitede da controlé le paziënt. Al é por nia y an ti va ma söi nerfs. Chësc vel ince cun le ascogne o jutè demez l’alcol. Al podess se dessené y fà ciamó aposta.
- Ne stede a mintí por un che á problems de alcol. Sce al ne röia n dé nia en orar a laurè o sce al se desmëntia i termins, dijede ciodi. Te chisc caji mëssel spo se to sö la responsabilité de ci che al à fat.
- Ne stede a ti dè da bëre. Sce al ô, che al vais instëss a s’l chirí.
- Porvede da strité impara le manco che al è poscibl. Chësc sarà bindebo ri, deache n alcolisé chirarà tres val’ da ti trà dant al proscimo.
- Gonot à n alcolist problems finanziars. Fajedi presënta chësta cossa, dijedi che al à debic, mo ne stede nia a paié por al. Zënza veighi che le problem di debic vëgn metü apost te na manira o tl’atra y spo ne se crüzi nia y fej inant sciöche ai à tres fat.
- Baiede cun i atri familiars (mituns, fredesc, compagns) dl problem che ês te ciasa. Insciö po i atri imparè da capí la situaziun y nia da ti orëi mal al alcolist instëss.
- Sce la porsona che á le problem dl alcol é osc partner, fajede aladô che al sides contat sesual ma canche l’ater é sinzir. Insciö jararà da evité deplü delujiuns.
- Baiede cun l´alcolisé de sü problems ma canche al é sinzir, o canche al ciara almanco fora aladô.
- Ciarede ince de os instësc. Jide fora da sëra, fajede val’ hobby, destachede datrai dala ria situaziun familiara.
- Sce osc partner, che bër, ne é nia bun da capí che al foss dërt lascè, tolede na dezijiun plü sterscia y jidi pormez cun n avocat y i documënc de separaziun. Sön chera podëise ti dí che sce al lascia da bëre spo s’la punsëise sura ciamò n iade. Dijed cun manira, zënza se dessenè o ti trà dant val'.
