A ci me intëni pa che mi colegs o mi chef à n problem de alcoldipendënza?
Stè demez dal laûr
- Al mancia gonot dal laûr, fora de nia
- Atres porsones le scusëia (por ejëmpl le partner)
- Al mancia dartan les ores de laûr, zënza na spligaziun
Pro le laûr
- Al fej tres demanco pro le laûr
- Al ne capësc nia plü tan saurí co denant
- Al ne é nia plü bun da se conzentré
- An ne po nia plü se lascé sön ël
Cambiamënc de comportamënt
- Al à de gran lönes
- Al é nervös y se dessëna atira
- Al é ri da baié para
- Al é dër arogant y agressiv
Co ciarel pa fora esteriormënter
- Al ne se lava nia plü y se vist ci che al à sotman
- Al à les mans che ti trëmora dassënn
- Assuié tröp
- Dificoltês da baié
- Al pro da ascogne le tof dala bocia fora (cun papes…)
- Al tofa da alcol
Sciöche al se astila en general
- Al bër canche al ne messass nia ester
- Bëre adascusc y ascogne l'alcol
- Al fej aposta da se lascé odëi che al bër boandes analcoliches
- Al dij che al nen à boiü demanco de ci che é vëi
- Al se invënta de döt pur podëi bëre
Ci mëssi pa fà sce mi colegs de laûr bër?
Al é tres le miu baié diretamënter cun le coleg che à n problem cun l'alcol. An podess ti dí che an se crüzia por so comportamënt o ti spieghé che al é cambié. An ne dess nia brunturé o baié mal, mo ma ciaré da ti fà odëi ite i pici fai. Al é pa bëgn dër saurí che chësta porsona strites jö döt y devëntes ri, mo chëstes cosses ne dess nia se fà sperde.Por ester de bogn colegs mëssun ince ti fà odëi che i se cruziun por ëi. Y chësc ô sambëgn dí che an mëss dí la verité.
Sce le coleg, do che an a baié para ne cambia nia y bër inant, forsc ciamò deplü co denant, éle le cajo da nen baié cun le chef. Chësc ne dess nia ester n tradí la fiducia de n coleg, chësc po ester so unich aiüt (plü dessigü ne fajará na porsona alcolisada nia por süa dependënza cina che i atri le dëida fora indlunch). Te n te cajo éle spo le chef che po daidé inant. Aladô dla grandëza dla dita de laûr éle ince la disponibilité de na consulënza soziala olache an po mené les porsones dependëntes.
