Miorëia les prestaziuns sportives sce an bër alcol?
Da 20-40 mg/l de alcol tl sanch se sëntun plü lisirs e an se stà plü saorí, la tëma va zoruch, an ciafa plü . coraje y le tremoré da gní ester grams scomparësc. Chësc podess ester n vantaje tl sport dl trà ala scëiba o stlopeté porchël alda l'alcol te chëj cajo sön la lista doping.
Sce an bër devëntun ince plü sigüsc de sé instësc, al momënt, y chësc podess ester de prigo pro le sport. An ne sënt nia plü tan le mé y an se sënt stersc, cina che an n'è nia plü bogn da se controlé y se fej dl mal a sé instësc y ai atri.
Ci che l'alcol gauja tl sport
Da 60-90mg/l de alcol tl sanch vëgnel a mancé les capacitês motories. Da 1,1 g/L esun praticamëter cioc y chësc podes ester la gauja sce an vëiga püch dedo, sce an ciancantëia o sce an n'é nia plü bogn da se möie. Da 0,5 g/L va de revers la prestaziun fisica y an perd abilité insciö n'é n atlet nia bun da reagí atira, cossa che an adora tröp pro le tennis o sport de grup. La forza vëgn plan plan ince tres demanco, chësc podess spo avëi conseguënzes pro le salt alt o le salt lunch.
Alcol do le sport, éle le cajo?
En pice gote de vin o de bira moscedé cun ega podess ince jí bun atira do le sport, deache al ti dà al corp debota les calories y i minerai pordüs.
Mo tla pröma ora do le sforz fossel dërt bëre tröpa ega por ti dè al corp i minerai pordüs.
Sce i feji sport do che i à boiü, vëgnel plü debota laurè sö l'alcol?
Assolutamënter nia! Sport y alcol ti dà al corp ciamò n laûr plü gran. Le cör y le fié à pö bele n gran laûr da laoré sö l'alcol, sce an fej spo ciamò n sforz lapró á chisc organs le dopl dl laûr.
Al é ince prigo che an assüi fora saurí ciodiche sce le corp à zënza da laûr ne lascel nia fora i ormons che stimolëia le jí ala sela.
