Por jí cun l'auto te na manira sigüda
La sicurëza sön strada depënd da trëi cosses:
La strada: strades nia cunciades fora, plënes de otes nia mostrades dant, encrujades olache an vëiga püch. An dess mët averda!
L'auto: i montli, i frens, les löms. Chësc depënd dal ciafêr, al dess controlè l'auto plü gonot.
L'ciafêr instëss: jí cun cherianza, le nia mët averda canche les strades n'é nia te beles condiziuns por la plöia o la nëi, le adorè le fonin, le bëre alcol tratan o denant che an va cun l'auto.
Chëstes é dötes situaziuns olache al podess ester prigo da fà inzidenc.
Ci fej pa l'alcol?
L'alcol che vëgn boiü röia naôta tl ciorvel y dà na sensaziun de euforia. An se sënt plü stersc, plü sigüsc y plü da sciafié co zënza. Mo metede averda!!! L'alcol è sciöche na pilora por calmé, al fej aladô che i reflesc se apanëies y ais plü dî da reagí. Chësc oress di che an adora plü dî da arforé sce an va cun l'auto, y an adora le dopl o trëi iadi tan por rové do a ci che an mëss fà.
Ci sozedl pa sce an bër?
Canche an à n tant de alcol tl sanch ne vëigun nia plü dales pertes y al comparësc na vijiun a tunel. An ne vëiga nia plü i auti che ô jí dlungia ia, tles encrujades valutëiun mal les distanzes, al pê che an ais lerch assà da sorpassè y deperpo n'él nia vëi.
Tan de alcol él pa te n gote?
N gran gote de bira, n gote de vin o n stamperle de ega de vita à plü o manco le medemo contegnü de alcol laîte. Ciodi? Va bun che la bira à le mez di gradi de alcol co le vin, mo porchël nen él te n gote dala bira le dopl laîte.
La lege dij che por jí cun l'auto ne dessun nia avëi deplü co 0,5 gr de alcol por liter de sanch. Ara ne va nia da dí avisa tan che an po bëre por arjunje chesc limit, al depënd en pü da vignun de nos: le pëis, l'eté, le ses, sce an bër plü gonot o nia, sce an à le magun plëgn o no. Ince le smaltí l alcol ne è nia pro düc anfat. An po dí plü o manco che an adora n'ora por vigni gote buiü. En dess tigní presënt che sce an bër tröp da sëra spo pon ince ester sura le limit ciamò le dé do dadoman.
