I mituns vëgn ausá dër adora ala saû dl'alcol, i le ciafun tl patüc dûc y tl patüc da mangé, ince ti produc che é spezificà por mituns. Insciö, canche i pici jogn röia pro l´alcol esi bele ausà a chësta stleta saû.
Bele da pici fejun les prömes esperiënzes cun l'alcol. Le complí di agn dla lâ. Por festejé chësc avenimënt po düc se tó na picia bocia de vin da scaia. Por n möt é chësc le pröm vare tla vita da adult.
N gran va dan fora cun l'ejëmpl: le bëre fej pert dla vita di gragn. An ne po nia se fà demorvëia sce ai mët bel man da bëre cun apëna 14 agn.
Le consumé boandes alcoliches alda pro nosta sozieté, al fej pert dl monn di gragn. Sce n jonn ô ester al'alteza de n ater jonn spo mëssel feter bëre. Un che ne bër nia vëgn defata metü sön na pert, da sú. Al é piceres cosses che ti dà la sbürla ai jogn de fa ci che ne é nia dërt. Porchël él le dovëi de n adult da jí danfora cun le bun ejëmpl.
Chiló dessot valgügn consëis:
- Ciarede da baié plü gonot che ara va cun döta la familia di problems atuai.
- Ascutede dagnora üsc mituns, ince canche ai à ma te pici crüzi y le problem é pice, magari por vëi éle de gran importanza. Insciö jararà da costruí na basa de fiducia danter le möt y n adult.
- Ciarede da tigní vies les tradiziuns de familia, al é important le dialog y le tigní adöm. Por ejëmpl le fin dl'edema, gostede düc adöm.
- Jide danfora cun le bun ejëmpl y limitesse ince os a bëre y fumé demanco.
- Organisede dis olache döta la familia stà adöm a fa val' jüch, o na bela jita olache al ti sa bel a düc.
- Lascedi fà piceres cosses de importanza a üsc mituns, che ai ais val' picera responsabilité.
- Ince i jogn mëss fa sües esperienzes negatives, lapró alda les delujiuns, se dessené, avëi la ria löna. Lascedi avëi porvé da sfà fora sü pici problems.
Vigni extrem podess ester demassa. Chësc ô dí che sce an ti lascia massa tröpa liberté ai mituns, an ti lascia tres fà ci che ai ô y ne stà nia bëgn dî a se cruzié spo podessi se sintí metüs sön na pert. Sce an ti stà do demassa, i brontora tres y ni lascia nia fa sües esperiënzes ne poi nia conësce le monn sciöche al é veramënter. Al é ri ciafè n trú amesa ite, por trà sö sciöche al alda i mituns, mo al paia la möia porvé.
Aiüt – él val' che ne va nia!?
Ci mëssi pa fà sce mi möt o mia möta vëgn na sëra cioch a ciasa do na festa?
Naota mantigní la calma. Sce an i brontora te n te' momënt ai la tenjiun de fà ciamó aposta. An dess ti baié ados le dé do, cun calma y porvé da ti spieghé che al ne nia chësc le dërt comportamënt.
Sce chësta cossa sozed ma un n iade ne desson nia suravaluté le problem. Mo tignide la situaziun sot a control. Sce al mët man da sozede plü gonot y osc möt o möta va ince te ciasa a se chirí l´alcol da bëre dessun met averda. Chirisse n grup de autoaiüt ten te' cajo, baiede cun esperc, chi savará da se daidé.
