Al esist plü manieres da tomè indô zoruch te na dependënza.
…atira
N per de alcolisc sënt do n cört tëmp de astinënza n gran bojëgn da se lascè ia, da se rilassé. Sce le pinsir, te chësc cajo "bëri o ne bëri nia" röia a só fin, mët l'alcolist man da bëre zënza lascè do, cina che al se stà indô saurí, cina che al à la sensaziun da ester stè bun da recuperé ci che al n'à nia boiü tl tëmp de astinënza.
…plan plan
Ince chëstes porsones toma zoruch atira, mo la gran pert é buna da lascè, relativamënter debota la boanda. Mo le pinsir é gnü de revers y porchël, do n strüf, vëgnel boiü inant. Dal pröm al secundo iade che an bër, do la terapia, pol ince passé döes edemes. Mo do le secundo iade ne esun nia spo bogn da se tigní y an ciafa indô le viz da bëre, sciöche denant.
…insidiosamënter
Tröpes porsones che à albü n problem cun l'alcol mina da ester bogn da controlé le bëre. Cun n ejëmpl porvunse da se fa capí.
Le signur X é fora de terapia da oramai 6 mëisc. Feter vigni sëra val te na ostaria cun i cumpagns a cartè. Al à tres boiü ega, che vël se comana.
Na sëra, a düc ti sal particolarmënter bel y da rí, se comanel ince ël na bira, sciöche i atri. Al ne sozed nia, y porchël metel man da se comané vigni sëra na bira. Te chësc temp é dagnora jü döt bun, ince sce X à tres sintí n gran druch te ël. Ciodi nen pol pa nia ince ël nen bëre deplü, sciöche düc i atri? Di al sburlé demez chësc pinsir, ciodiche al conësciô bun le conseguënzes. Mo chësta tortura n'al nia tigní di, y insciö el defata do, tomè zoruch tla dependënza.
