Canche uma y pere bër…
Tröc adulc bër alcol do le laûr, pro cëna, sce al é val' festa o n'ocajiun particolara. Gonot vëgnel sotvaluté le prigo de chësta nosta droga legala. Le 20 % di adulc à n problem cun l'alcol, danter chisc éle tröc peri y umes. Ci pon pa fà sce i geniturs bër?
Dipendënza da alcol
La dependënza da alcol é na maratia! Ince sce chësta sostanza, o le bëre en general é sozialmënter azetà él dër saurí da deventé fisicamënter y psichicamënter dependënc.
L'alcol influenzëia dër la vita de chi che le bër, por chisc va chësta sostanza al pröm post gaujan insciö problems te döta la familia.
Sce tü geniturs bër alcol vigni tan ne ôl nia di che ai é alcolisà. Tröc mituns y jogn se intënn snel sce i geniturs bër demassa.
I efec dl alcol te familia.
I parënc dla porsona che bër ne patësc nia por la sostanza instëssa mo por i problems che l'alcol porta te ciasa.
- Gonot ne é la porsona che bër nia plü buna da ti jí do a sü dovëis, y insciö éle i atri mëmbri dla familia che mëss se to les responsabilitês.
- I familiars mëss soporté les lönes de chi che bër. Gonot vëgnel for a conflic y violënza.
- En alcolisé se stënta dër da mantigní ci che al impormët, insciö saltel fora stritaries.
- Al vëgn gonot ascugnü ia sce valgügn te familia a n problem cun l'alcol, al vëgn fat finta de nia, ince sce la familia mëss spo mintí.
- Gonot ne san nia ci che an sënt ti confrunc dla porsona che bër. Sce an ti à le sënn, sce an ti ô bun, delujiun, tristëza y datrai pon ince se sgricé.
Recordete:
Te ne es nia da su!
Ince sce al po te dé en mënt, ara n'é nia insciö. Al é n gröm de mituns y jogn che à i geniturs che bër. Madër che al ne vëgn nia dit porciodi che an se doda y se tëm dala reaziun dles atres porsones.
Mo al n'é nia colpa tüa!
Tröc familiars se damana instësc ci che ai à fat de falé. Nia, degügn ne po se tó la responsabilité dla dipendënza de valgügn de atri anfat ciünes che é ince les gaujes che na uma o n pere bër, tö n'es nia dla colpa!!!!
L'alcolism é na maratia
y porchël val debojëgn de na terapia cun doturs y esperc dlungia. Ince sce vignun de nos oress daidé, da susc ne ti fossun mai bugn. Al ne é nia saurí da capí chesc mo ara é insciö.
Sciöche bele dit,
é l'alcolism na maratia che va metüda tles mans di esperc. Important él che an ciares ince de sé instësc:- Porvede da ester n pü' egoisc, ince os ëis le dërt da ester cuntënc.
- Ciarede de üsc hobbys y de üsc compagns.
- La vita cun na porsona che bër te ciasa n'é nia saurida. Ciarede da cöie adöm energies y fajede val' por os instësc.
- Chirisse na porsona a chëra che ti ëis fiducia y baiede impara, che ara se stais dlungia tl momënt dl bojëgn (parënc, amisc, maestri).
- Al é ince grups de autoaiüt por familiars, chisc se dà dessigü n aiüt.
- Y ala fin sunse ince nos.Se ara se trata de dependënza da alcol sunse tres arjignà a ascuté y dé val' consëi o aiüt.
