Trëi jones söi 20 agn va cun en pice auto, na Ka, sön na strada mediamënter traficada. La velocité è moderada y al ne è nia tröc auti sön strada. Les trëi jones se devertësc y sla ri, tartan che chëra che va con l´auto ti organisëia ala compagna che è dlungia na incuntada cun le jonn che ti plej, scrion en sms. La jona destol en pice mumënt la conzentraziun dala strada, ciaran sön le telefon per se chirí le numer fora dla rubrica. La man che è sön le volante perd le control de püc cm, la roda dl pice auto röia mez meter sön l atra corsia y l´auto che vëgn decuntra splundra dassënn tla picia Ka olache les mitans è laite. L´auto dles jones se roda trëi iadi y röia ia dal atra pert de strada.

Les jones sbat öna cuntra l atra, spo mazeres le cé sön l airbag che è salté fora y ala fin ciamó dassënn cuntra vider. An alda scraian, sanch röia indlunch… Finalmënter stá l auto chit, amesa strada, la jona che jo cun l auto deura i edli y ti ciara ala compagna dlungia, spordüda sö, mo ciamó via. Mo chësc ne è nia döt: te en iade röia adalerch en ater auto, che ti salta deplëgn da na pert ite ala Ka, ti don na gran sbürla. Les mitans laite somëia popes de peza, i brac jora sciöche chi de na marionetta, al pe che i ces se destaches dal col. Sëgn era veramënter rovada.

La jona che jo cul auto mët man de pité, ara è buna da se oje a ti ciaré a sües companges, trames dös mortes. Ara scraia desperada. En jonn salta adalerch por ti dé le pröm aiüt, al röia adarlerch i carabiniers, i stödafüch y la crusc blancia; ai stlü la strada y al vëgn cumpedé i morc: les dös jones che é tla Ka, en pere y na uma tl auto dlungia, le pice möt che ai a iadedo tl seggiolino á i edli spalanca daverc, sënza vita, la só dl pice scraia y damana ciudi che süa uma y só pere ne respogn nia sce ara i chërda. La Ka vëgn daverta sciöche en bosse, al ti vëgn dit ala jona da se calmé y al vëgn damané sciöche les atres 2 mitans che è te auto á inom. En carabinier oj le cé dla jona che è iadedo, mo chësta le lascia tomé zoruch, sënza sëgn de vita. En jolier tol jö le inzidënt dal alt, doturs y carabiniers tol fora la jona che è ciamó in vita dal auto, chësta ne se è fat praticamënter nia! Cun en per de sgrafedades tla müsa vëgnera imobilisada sön na barela. Le jolier dl pröm aiüt è ince rové adalerch, i doturs ciaria la barela tl jolier por che al pois porté la jona te spitol. Da lassö jö vëigun en gran föm, i auti che è saltá adöm ciara fora sciöche sce ai foss de cartun y la jona che jo cun l´auto, chëra che á scrit en scëmpl sms, pita! Ara è desperada, ponsan ala gran cavolada che ara á fat. La plü gran cavolada de süa vita!

Ala fin dij chësc film: can che te vas cun l auto, nó scri sms! Na publicité paiada dala polizia e dales scores dl Galles por la segurëza sön strada. La conzentraziun sön strada è la cossa plü importanta. An ne pënsa nia che sce an destol en cört mumënt i edli dala strada pol sozede de döt! Mo tan gonot sozedl pa che al sona le telefon can che jun cun l auto? O che an se chir valch te tascia? O tan gonot sozedel pa che an se bër magari en pice gote de vin, o en aperitiv, y dopo van cun l auto a ciasa? Chiló dijará tröc “A pu ci ost pa ince che al sides en gote de vin”, al basta ince chël! La conzentraziun ne è nia plü chëra che an á sënza. Magari ne sozedel 99 iadi nia, mo sce al ess da sozede un en iade valch, spo? Dlungia chisc pinsiers me damani ince ciudi che chëstes iniziatives, chëstes publicites, vëgn ma fates fora de ca, y nia chiló da nos. Ince sce an va fora por les Autostrades todësches ciafunse vigni sort de placac dlungia strada ola che al vëgn mostré scenes che fej punsé. Mo te nosta vita da vigni dé, plëna de stress y laur, ne unse nia tëmp da se fa pinsirs sura chëstes cosses, fina che al ne sozed nia valch…..

T. M.
Vëndres, 13.05.2011 09:50